| سبحان الله والحمد لله ولا إله إلا الله والله أكبر |
أحبتي الفندان من أشهر الطرق المستخدمة لتغطية الكيك ويستخدم في إعداد قوالب الكيك الكبيرة وهي عبارة عن عجينة سكرية يمكن تشكيلها وتلوينها .أحبتي حبيت أذكر أهم الوصفات الي منتشرة حالياُ والكل جربها أو إعتمدها في وصفاتهوبشكل عام في أكثر من طريقة تتبع لعمل الفندان منها تسخين السكر وتبريده ومنها طريقة المارشملو والي ما أنصحكم بإستخدامها أبداً , لاني جربتها شخصياً وكانت (قاسمة جداً بسبب برودة المارشملو بعد ما عجنتها . صعبة الفرد والتشكيل جداً . لما تاكلينها تحسين انج تاكلين لبان فبالتالي عندي تقطيع الكيك المغطى بالفندان ما راح تقدرين تحصلين على قطع مرتبة لاني الفندان قاسي وما ينقطع بسهولة ويشد مثل اللبان. ).
وأحبتي توجد حالياً أنواع كثيرة في السوق ومنها الفندان الجاهز ويعتبر الأنسب من حيث الاستخدام لأنه سهل وما في أي تعقيدات ممكن تواجهنا يكفي اني نرش سكر بودرة مطحون ونبدأ نفرد وبعدين نشكل . وفيه الفندان الرول والي يكون جاهز وملفوف على عود بلاستك ويستخدم للتغطية فقط لكن عيبة انه غليظ شوي وسميك في حال استخدمناه في تغطية الكيك أو الكب كيك بالإضافة إلى صعوبة فرده لجعله رقيق أكثر.
اليوم راح أعلمكم طريقة مضمونة وسهلة . وفي نفس الوقت مكوناتها متوفرة في كارفور أو سبينس بشكل أكيد. أحتبي في البداية راح نحتاج إلى عدد 2 وعاء زجاجي عميق واحد كبير والثاني صغير .
نأتي إلى مكونات الفندان 3 ملاعق سمن كرسكو الأزرق وليس الأصفر وممكن نستخدم الدهن النباتي او الشورتنج من ماركة مازولا تلاقونة حالياُ في كل الجمعيات .
نص كيلو سكر بودرة وأروع نوع في السوق هو (SIS) وما أنصحكم أبداً تطحنون سكر بودرة في البيت لانكم مهما طحنتوا ونخلتوا ما راح توصلون لدرجة النعومة المطلوبة لاني السكر الجاهز مطحون بطرق خاص بالاضافة إلى إحتوائه على مواعد مانعة للإلتصاق وهذا الي يعطية ملمس النشا الناعم.
¼ كوب ماء عادي
½ كوب جلكوز أو ممكن تستخدمون الايت كورن سيرب (أشتريهم من سبينس)
1 ملعقة كبيرة من الجلسرين السائل (اشتريته من سبينس وممكن تلاقونة في كارفور بعد)
1 ملعقة كبيرة من الجيلاتين البودرة (موجود في أي جمعية)
وهذي صورة للجلسرين للي ما يعرفة
وراح نحتاج إلى قطاعات للفندان وهذي علبة من علبي الخاصة بحفظ القطاعات .
وانا اخترت هذيلا دائرة وقلوب
وراح نحتاج في التزين إلى حبوب اللول واللون الغذائي أنا اخترت الأحمر . وكان عندي فندان سائل باللون الأحمر والأبيض (الألوان اشترتيها من تافولا).
وهذا فندان كنت مسوتنة لتزين بسكوت لمناسبة خاصة فإستغليته في الموضوع.
وللفرد راح نحتاج إلى نشا الذرة .
بإسم الله نبدأ بطريقة عمل الفندان الخاص بالتشكيل.
بداية أحبتي نصب 1/4 كوب الماء بالاضافة إلى ملعقة الجيلاتين ونقلب إلى أن يذوب الجيلاتين .
وهذا راح يكون شكله.
نضيف مقدار الجلسرين
ونضيف الجلكوز
ونرفع الوعاء على حمام مائي ونحرص إ ني الماء ما يلامس الوعاء المطلوب انه يسخن من تأثير البخار المتصاعد من الماء . ونبدأ نقلب المزيج. وراح يحتاج بالكثير 7-10 دقائق
وهني شكل وقوام المزيج بعد ما تأكدنا من ذوبان كل المكونات وإندماجها مع بعض.
بعد ما نبعد الوعاء عن النار نكون مجهزين 3 ملاعق من سمن كرسكو ونتاكد أحبتي من المقادر ونقيسة بملعقة القياس الكبيرة .
اهني ضفناها وبدينا نقلب
ونخليها شوي على جنب وراح يذوب على مهل لاني المزيج دافئ مش حار وايد
واهني شكل المزيج لاحظوا أحبتي صار كثيف نوعماً وللعلم المزيج بعد ما نشيله من على النار يكون فاتر مش حار جداً لاني المطلوب إني نمزج المكونات بدون ما نوصل الخليط لدرجة الغليان عسب ما يذوبنا لنا السكر لما نعجن الفندان.
في الوعاء الزجاج الكبيرة نصب كيس السكر البودرة سعة النص كيلو
اهني صار عندنا مزيج المكونات السائلة جاهز بالاضافة إلى السكر البودرة
نلبس الققاز عسب يسهل عليها العجين
نصب المزيج السائل على السكر البودرة كما هو موضح في الصور أدناه أحبتي .
نبدأ نعجن الفندان بإيدينا
لاحظوا أحبتي كيف الفندان بسرعة بدأ يستوعب السكر ويتشكل
لاحظوا هني الشكل المطاط جداً للفندان وهذا من تأثير الجلوكوز والجلسيرين.نستمر في العجن أحبتي كما هو موضح أدناه بالخطوات المصورة
لاحظوا هني حتى بعد ما استوعب السكر كله قوامة لازال مطاطا جدا ً وهذا هو المطلوب.
هني بعد ما انتهينا بشكل كامل من عجن الفندان
صورة مقربة للفندان
ونحاول أحبتي نغلف الوعاء بالبلاستك عسب ما ينشف من تأثير الهواء
مرحلة تشكيل الفندان .
نستخدم ورق الزبدة ونرش النشا لمنع إلتصاق الفندان
ونبدأ بالفرد بإستخدام النشابة
لاحظوا أحبتي كيف شكل العجينة قوامها متماسك جدا وقابلة للفرد والتشكيل . ونحاول ما يزيد سمك العجينة عن ½ سم .
ونبدأ نقطعها على شكل دوائر أو الشكل الي نحب .
وهني نلاحظ شكل الدوائر المقطوعة متناسق ومش مبعثر .
تلوين الفندان:
أحبتي تلوين الفندان يعتبر سهل جدا وممكن نتحكم بدرجة وقوة اللون من خلال كمية اللون المضافة. وهني اخترت اللون الأحمر
ولتسهيل المهم إستخدمت عود أسنان خشبي وخذت كمية بسيطة من اللون وحطيتها على العجينة
وعجتنها لحد ما اندمج اللون ووصلت للون الأحمر الي أباه. لاحظوا أحبتي في الصور أدناه.
لاحظوا أحبتي بعد ما فردها كيف نشله بسهولة مع العلم اني سماكته مش كبيرة لاكن العجينة سهلة التشكيل بشكل غير طبيعي .
واهني صوره أقرب لشكل الشريح وأنا شالتنها بإيدي.
ومن مميزات الفندان الناجح انه ما يجف بسرعة ومطاوع عند العمل فيه , وما يقاوم إذا فردناه . وتشكيله سهلة جدا جدا لاحظوا مرحلة تقطع اللون الأحمر في الصور أدناه عزيزاتي.
وتحتفظ في شكلها الي قطعناه حتى في أبسط وأصغر القطع الي ما يتعدى طولها 1 سم .
واهني بعد ما انتهينا من تقطيع وتشكيل الفندان باللونين الأبيض والأحمر.
وما ننسى نرش رشة خفيفة من النشا لمنع الالتصاق.
وما ننسى نغطية بورق الزبدة أو النايلة لحين الإستعمال أحبتي.
أحبتي السموحة منكم . هذا الملف سويته على السريع يعني ما خذيت وقتي في التفنن والتدقيق والتشكيل لاني مشغولة بملف عيد الاتحاد . لكن لاني وعدت الأخوات الي تواصلوا وياي وطلبوا مني طريقة الفندان اكثر من مرة بالذات العزيزة لوليانو والعزيزة العروس. عسب جي بتلاحظون إني التزين كان بسيط ومافي إبداع كبير أو أفكار لاني كنت مستعيلة وهدفي كان التركيز على الطريقة المصورة بالخطوات لعمل الفندان . لكن هذا الشي ما يمنع إني نشوف ثمرة المجهود ونجرب نزين بالفندان. عندي إهني كب كيك عادي
وللصق الفندان استخدمت المربى لكن ممكن نستبدلها بكريمة الخفق.
بداية أحبتي ندهن الكب كيك بشكل خفيف بالمربى
ونثبت دائرة الفندان عليها ونحاول نوزعها بشكل خفيف لحد ما تغطي سطح الكب كيك مثل ما نلاحظ في الصوره أدناه عزيزاتي . وهي المرحلة تعتبر مرحلة البناء بالنسبة للتزين بعجينة الفندان . لاني لازم نغطي قالب الكيك أو دائر الكيك قبل ما نبدأ بتزينها .
وهني شكل الحبات بعد ما غطيتهم بالفندان
وإذا حبينا نضيف أكثر من قطعة نحرص على وضع نقطة بسيطة من المربى أو الكريمة لإلصاق العجينة مع بعض.
وبعدين نتفنن في تزينهم عزيزاتي . ومثل ما أسلفت اليوم شوكلاتة مول مالها بارض للتزين لكن حاولت إني أنقذ ما يمكن إنقاذة وأزين وهذي كانت النتيجة
وهذي صورهم الفردية بشكل أدق وأوضح. وهذي إهداء حق لوليانو
وهذي حق العروس
وهذي حق شوكلاتة خخخخخ(عافان الله هذي البنت رازة وجها في كل شي)
وهني الصور الجماعية النهائية للكب كيك الي زينته بإستخدام عجينة الفندان الخاصة فييني.
واهني الوالدة فديتها كانوا يايلها ضيوف عقب العصر فسوت كيكة البرتقال صينيتين وحدة حقنا ووحدة حق الضيوف.
ونفس الشي الكيكة الرخامية وسوت صينيتين وحدة حقنا ووحدة حق الضيوف . لكن صينيتنا استعيلنا عليها وقصيناها وهي حارة من لذتها . يعطيتها العافية ويطول بعمرها يارب
و بالعافية عليكم ( ههه))
وجزاج الله خير
الاخت / بنت أبوها
معاج شيف شوكولاتة صاحبة هذا الموضوع .
أختي انج تنقلين الموضوع لمنتدى ثاني انا ما أمانع لكن تنسبين تعبي ومجهودي وتصويري لج هذا أنا ما أرضاه ورب العالمين ما يرضاه . مش بس هذا الموضوع إنتي لحد الحين ناسبة 3 مواضيع ضخمه ومحترفة من مواضيع الي من إختراعي الشخصي لنفسج . وغيرتي في أحد المواضيع في العنوان وحذفي اسمي(شوكلاتة) وحطيت أسمج.
الإبداع مش مجرد تظليل اسم المبدعة وكتابة إسمج مكانها لا الإبداع هو البداية من الصفر وصولا لمرحلة إبهار الأخرين .
|
المشاركة الأصلية كتبت بواسطة بنت أبوهــا
 الصراحة تعبتو انا اسوي … الطبخ مب تعب لاكن يباله ضبط .. ابغي رد يبيض الويه
|
جذبتي اونج تعبتي وانتي تسوينه؟؟؟
الله اكبر عليج هذا مب مالج ولاانتي سويتيه اصلن
كيف تقولين جي خافي ربج ترا محاسبة على كل كلمة ^^
بس لامانه
موضوع منقول ولا
