كيكه التمر بتوفي القهوه 2024.

جايب لكم طريقة اسهل كيكة تمر مرت علي, مقاديرها وطريقتها مايبيلها اي مجهود..والنتيجة كيكة جميلة وكثير سوفت على قولة منال العالم

المقادير :
بيضتين+رشة فانيلا
نصف كوب سكر بودرة
نصف كوب زيت
كوب ماء حار + كوب تمر
كوب طحين (يفضل الطحين كويتي)
ملعقة كبيرةبيكنج باودر
ربع ملعقة صغيرة من القرفة البودرة
رشة ملح

الطريقة :
نحط التمر في وعاء صغير ونصب فوقه الماء الساخن ونتركه نص ساعة تقريبا
في الخلاط نخفق البيض مع الفانيلا بعدين نضيف السكر ونستمر بالخفق ثم الزيت ونستمر نخفق ثم نضيف خليط التمر والماء ونخلط
ننخل النواشف كلها مع بعض ونصب الخليط اللي بالخلاط فوقها ونخلطها على اقل سرعة اذا كان بخلاط الكيك او ممكن بمضرب يدوي
نصب المزيج في صينية مدهونة بالزيت ومرشوشة بالطحين ..
وندخلها في فرن متوسط الحرارة [165 درجة مئوية ] لمدة نص ساعة تقريبا
وعالوجه نحط طبقة من توفي القهوة والجوز

طريقة التوفي:
3 فناجيل سكر تذوب عالنار مع ملعقه صغيرونه زبده..بمجرد مايذوب السكر ويصير لونه ذهبي نضيف له علبة قشطة دافيه(طلعيها من علبتها وسخنيها بالمكرويف) وحركي بسرعه لين توصلين للون والقوام اللي تبينه

لا تخافين ماراح يتعقد ولا يتكتل لان القشطة دافية
انا هنا كنت ابي بالتوفي نكهة قهوه فأضفت له ملعقتين نسكافيه

وبالهناء وعااااافية