سفرة عشاء أكل لذيذ وتقديم جميل الصور 2024.

وعليهم وعليكم بألف عافيه

وهذه صورته كامل

وهذا الرز قبل ما ألحفه في الخبز وطبعاً نسميه عندنا مثلوثه لأنه 3 طبقات والصور جايتكم بالتفصيل الممل

وهذه الطبقه الأولى وهي القرصان بالخضار

وهذا الجريش وفوقه الحشو

وهذا الرز فوق الجريش

وبعدها نحط الحشو اللي للرز

وبعدها الأيدام تبين لحم أو دجاج وأنا طبخت على دجاج

وحطيت عليه فلفل حار للي يحب

ولحفته بخبز صاج من المعامير

وهذا ورق العنب مع محشي كرمب

وهذه السلطه

وهذا الحلو شيز كيك

وهذا كان عشاهم

المثلوثه

1- القرصان / نفرم بصلتين ناعمين ونحمسهم مع 4 حبات طماط كبار مخلوطين بالخلاط وبعد مايتحمر نضيف عليهم الماء والخضار المثلجه ( بزاليا وجزر وذره ) لحد مايغلي المرق ونضيف عليه أصبع زبده والخبز القرصان ونحرك لحد ما يتشرب الخبز المرق ونخليه على نار هاديه لمدة 10 دقائق فقط

يعني ماتاخذ كل الشغله غير 15 دقيقه بس

2- الجريش / نفرم بصل ناعم ونضعه في القدر مع ملح وكمون ومكعبين ماجي والماء المغلي مسبقاً
ونكون مغسلين الجريش ومنقعينه من ساعه
نضيف الجريش للماء وطبعاً المفروض يكون الماء ضعفين الجريش
ونخليه يطبخ لحد ما يبدأ يقل الماء من الجريش ونضيف عليه لبن المراعي حتى يعطيه اللون الأبيض وطعم الحموضه
ونحرك كل 5 دقايق حتى ما يلزق الجريش في قاع القدر ولما تبدأء حبة الجريش تذوب نهائياً نخليه على نار هادئه جداً لما كل حب الجريش يذووووب

3- الرز / أولا راح نكبس على مرق الدجاج
يعني بحمر بصل مفروم صغير مع زيت أكثر من أنه مجرد تحمير ونضيف عليه الدجاج ونقلب لحد مايبدأ الدجاج يحمر نضيف عليه البهارات الحب وهي الهيل ومسمار و فلفل أسود ولومي أسود وورق الغار وكمون وكزبره ثم نضيف الماء المغلي على الدجاج
لاحظوووا ما نحط الملح لحد ما يطبخ الدجاج لمده 20 دقيقه وبعدها نملح مرق الدجاج ويطبخ لحد مايستوي الدجاج
نحط الدجاج في الفرن بعد ما يتبل بالصلصه والكاتشب واللومي الأسود الناعم والهيل الناعم وقليل من مرق الدجاج

نشخل مرق الدجاج من البصل والبهارات الحب ونضيف عليه ماء وملح حسب كمية المرق الموجوده وكميه الرز اللي تبين وما ننسى أن الرز مغسول ومنقوع لمده 1/2 ساعه ( بسمتي )
ونكبس الرز على مرق الدجاج والمهم الماء يزيد عن الرز بس بشي بسيط يعني 3 سنتمتر
ونغطيه بقصدير ونخليه يستوي على نار هادئه

*** حشو الجريش// يتكون من بصل وملح ولومي أسود ناعم وفلفل أسود فقط يحمس في زيت أو سمنه

*** حشو الرز// يحمر البصل مع الملح وفلفل ولومي أسود ناعم وحمص حب ناشف( مسلوق من قبل )

ورق العنب والكرمب

الحشوه // هي بصل وثوم وطماط 2 مكعب ماجي نحمسهم لحد ما يذوب الطماط ونضيف عليه الرز المصري والبهارات وعصير الليمون حسب الرغبه يحمس لمده 10 دقائق ونطفي عليه ونضيف البقدونس والكزبره ونخلطهم ولما تبرد الخلطه نبدأ نحسي

نقطع البطاط شرايح ونصفها في قاع القدر ونصف ورق العنب ثم نصف محشي الكرمب طبقه ثالثه
نضيف 1/2 كأس عصير ليمون + 1/2 كاس زيت زيتون + كأس تمر هندي منقوع في ماء مغلي ( نشخل التمر هندي وناخذ مقدار كأس )
ونخليه على النار لحد ما يبدأ يغلي
ونوطي على النار لمده ساعه فقط

والسلطه ما فيها زود عاديه بس طريقة الترتيب عطها شكل ثاني
صوص السلطه // 2 م ك خل أبيض + 2 م ك خردل + قليل من عصير الليمون + زيت زيتون + رشة سماق أحمر

الشيز كيك ’(

1-نطحن بسكويت دايجستف 10 حبات كبيره
6 حبات زبده صغيره
ونفتتهم في قاع الكأس
2- نذوب 1 م ص جيلاتين بقري في 1/4 كأس ماء مغلي ونتركه حتى يبرد
3- نخلط في خلاط الكأس ( ظرف دريم ويب + 1 قشطة + 12 حبه جبن كيري + 1 علبة نستله + الجيلاتين الذائب في الماء )
ملاحظه نضيف المقادير بنفس الترتيب ( دريم ويب قشطه جبن نستله جيلاتين )حتى ما يتكتل

نخليه في الثلاجه حتى يتماسك وبالضبط يبيله ساعه أذا الثلاجه برودتها عاليه ونضيف طبقه التوت قبل التقديم

وعليكم بألف عافيه {"

أتمنى يكون عشاي عجبكم حتى لو ماذقتوه

منقووووووول