الطريقة الاصلية لاعداد شاي الكرك 2024.

بسم الله الرحمن الرحيم
اخباركم ان شاء الله بخير وعافية………………
بدون ما أطول عليكم اليوم محضرلكم الطريقة السهلة والاساسية في اعداد شاي الكرك والي مايعرف عنها الكثير واذا لاحظتوا في اغلب المواقع كل طريقة تختلف عن الثانية الي يقول ضيف هيل والي يقول شاي الكرك يضاف اليه الزعفران ,وماي الورد, والبعض يقول ان السر هو اضاف بسكوت في شاي الكرك …سلامات…….( طبعا كل هذه الطرق مجرد اضافات مالها اي اساس بشاي الكرك صدقوني كلها جربتها ولاحظت ان هاذي الطرق ماخلت طعم شاي الكرك نفس مايسونها بعض المطاعم….لكن السر هو اني يلست اخبص الين ماوصلت للطريقة ….الي مو مصدق الين الحين يجرب ويشوف نبدا على بركة الله……
المقادير…..
1-نحضر 6 ملاعق شاي لبتون او اي نوع اخر بشرط انه مايكون ورق وكذلك الملعقة يكون حجمها صغير مب مره صغيرة…..
2-نجهز الكوفي مايت(ما أعتقد في احد ما يعرفه)
3-السكر حسب الرغبة
4-علبة حليب ابوقوس+نص علبة ثانية بس ما نحطها كلها

طريقة التحضير………..

اول شي نجهز الغوري ونصب المياي لحد الوسط (انتبهوا لحد الوسط) طبعا على حسب الغوري الي موجود ويفضل يكون حجمها متوسط ونضيف ال6 ملاعق من الشاي لاتنسوا استخدموا ملعقة صغيرة مب صغيرة مرة ومن ثم السكر حسب الرغبة وتأكدوا من طعم السكر اخر شي مو مشكلة.
ثاني شي اول مايغلي الشاي احسبوا 15 دقيقة يعني ربع ساعة لا اكثر ولا اقل …لان لو زادت المدة راخ يتبخر الشاي وماراح تشربوا شي.
اثناء ال15 دقيقة جهزوا الدلة وضيفوا علبة حليب ابوقوس وعلبة ثانية بس مو كلها نصها….
ثالث شي واهم شي بعد ماتنتهي مدة الربع ساعة اطفوا النار وضيفوا الكوفي مايت في الشاي بس لما تضيفوه كثروا منه وقلبوا بالملعق لاحد يحط شوي وماعليكم من شكل الشاي الي راح يتكون وفي نفس الوقت اتأكدوا من طعم السكر ..راح يكون الشاي مر… ماعلينا بعد هالخطوات نرجع نشغل النار الين 3 دقايق تقريبا ومن بعدها نكون خلصنا واخر خطوة نصب الشاي في الدلة….

ملاحظات مهم((ركزوا)
1-الحليب نضيفه بالدلة مش في الغوري
2-اثناء غليان الشاي لاحد يضع الغطا على الغوري((السبب ان راح يستوي طعم شاي الكرك بخااار))

3-لاحد يضيف هيل او زعفران او اي شي-كل هالامور تدمر طعم شاي الكرك فانتبهوا (تجهزوا شاي الكرك بنفس الطريقة الي فووق)
4-الكوفي مايت مهم جدا وهو مش اضافة هو من احد المكونات السرية((اثناء مزج الشاي بالكوفي ميت صبوا وااايد))
5-مراعاة المقياس خصوصا الماي الي في الغوري لازم يكون في الوسط اذا كان حجم الغوري وسط واذا كان كبير فالماي يكون اكثر من الوسط بشوي واذا كان صغير ماينفع دورا غوري وسط……
6-اول مايغلي الشاي لاتطفوا النار ابد الا بعد 15 دقيقة طبعا لاحد يمسك تلفونه ويقعد يسولف وينشغل خلكم منتبهين ولااحد يتضايق ويتعصر شو وراكم انتظروا الا هي 15 دقيقة مب ساعة—اول ما تخلصوا خلكم مركزين على الغوري يمكن يندلق او شي الحذر واجب . احسبوا 15 دقيقة بدقة ………………………….

في الختام اتمني اني وفقت في تقديم هالطريقة في اعداد شاي الكرك الاصلي مش التقليدي امزح
وهي سهلة بس تحتاج لتركيز ووقت وصبر وماعليكم من الطرق والاضافات الي تسمعوا عنها كلها كلام فاضي ومالها اي علاقة بشاي الكرك ولما راح تجربوا طريقتي راح تعرفون…..وشكرا